Русиядә яңа Дума сайланды. Эчтәлеге шул ук : 4 декабрьдә Русиядә дәүләт думасына сайлау үтте. Беренчел нәтиҗәләрддән күренгәнчә, анда дүрт партия үткән. "Бердәм Русия" җиңсә дә, бу юлы аның тавышлары күпкә азрак. Бәйсез күзәтүчеләр тавыш бирү вакытында күпсанлы канун бозулар турында хәбәр итә. Якшәмбе көнне Русиядә үткән сайлауда парламентның түбән палатасындагы 450 урынга җиде партиянең вәкилләре дәгъва итте. Беренчел нәтиҗәләр буенча яңа думада, элеккесендә шикелле, шул ук дүрт партиянең әгъзалары утырачак: "Бердәм Русия", коммунистлар, "Гадел Русия" һәм ЛДРП. Аерма шунда: бу юлы алар, яңа тәртип нигезендә, дүрт түгел, биш елга сайланды.
Русиянең Үзәк сайлау комиссиясе рәисе Владимир Чуров тавышларның 70% чамасы саналганнан соң мондый нәтиҗәләр игълан итте:
"Бердәм Русия" – 49,93% (дүрт ел элек 64.3% иде);
Коммунистлар партиясе – 19,43% (11,57% иде);
"Гадел Русия" – 12,97% (7,74% иде);
ЛДРП – 11,87% (8,14% иде).
"Яблоко" (2,81%), "Правое дело" (0,57%) һәм "Русия патриотлары" (0,96%) бу юлы да думага үтмәячәк.
|
