Мөселманның хатыны ниләр яза? Сүзем Миләүшә Хәйруллинаның "Бер көн”(Татар хатыны ниләр күрә?) дигән мәкаләсе турында. ("Т.Я.”15 ноябрь). Әгәр бу мәкаләне авылдагы берәр әби язып, без укучыларны бәрәңге боткасы пешерергә өйрәтсә яки җәй буе колорадо коңгызы җыюы турында сөйләсә, мин каләмемне кулыма алып та тормас идем. Автор "Т.Я”ның мәгълүм вә абруйлы хәбәрчесе булганлыктан, кайбер кабул итеп булмый торган нәрсәләр турында сүз әйтмичә кала алмадым. Язма авторның чат саклаучы исерек ирләр белән очрашуыннан башланып китә. Монысына гына түзәрлек. Һәр авылда чат саклаучы һәм кибеткә керүчеләрдән 5-10 тәңкә сорап торучы сәрхүшләр җитәрлек. Ләкин менә шул күзләре тонган айнымас ирләрдән ниндидер информация алам дип бер шешә аракы һәм сыра алу, алу гына түгел,шул исерек белән бергә күтәреп эчү бөтенләй башка сыймаслык хәл. Өстәвенә әхлаксызлык та әле. Абруйлы корреспондент гамәле түгел бу. Информацияне киеме каткан, битләрен җон баскан исерекләрдән җыймыйлар. Аның өчен корреспондент таныклыгыңны тиешле оешмаларда өстәлгә куясың да, тиешле сорауларыңны бирәсең. Йә, нәрсә ишетте инде безнең авторыбыз шул сәрхүш авызыннан? Эткә дә, беткә дә билгеле бит инде ул поши аулаучыларның җыен җитәкче булуы. Аларның рөхсәт кәгазе белән кесәләре тулган: теләсәләр аю аталар, теләсәләр куян. Ачуларын бик чыгарсаң үзеңә дә чәпәргә күп сорап тормыйлар. Бөтен кеше белгән шул нәрсәләрне белү өчен генә мөселманның хатынына стакан күтәреп аракы эчәргә кирәк булдымы? Мөселманның хатынына дип ассызыклап язам. Чөнки Миләүшә ханым аракы эчеп кайтканнан соң өйдә эшләгән эшләрен дилбегә буе тезә-тезә дә "Менә, җәмәгать, мөселман хатынының бер көненең дүрттән бер өлеше шулай үтә”, дип нәтиҗә ясый. Көннең дүрттән бер өлешендә майтарылган эшләргә тукталып тормыйбыз, җәмәгать. Авылда яшәүче бөтенебездә шул хәл. Мөселман хатынының дигән сүзләр тешкә тиде. Димәк,ул үзе мөселман хатын булмаса да, аның ире Нурислам мөселман булып чыга. Татар теле укытучысы буларак, бу җөмләне мин шулай аңлыйм. Башкача була алмый. Ләкин мөселман булу өчен җиде кат тир түгәргә кирәк әле. Мин Нурисламның да мөселман булуына ышанып бетмим. Мөселман ир иртән хатыны белән бергә тора .”Нәрсә, мин сиңа нәнкә мәллә?” дип икенче ягына әйләнеп ятмый. Үзен мөселман хатыны дип язып М.Хәйруллина кемнәр тегермәненә су коя? Мөселман хатыннары менә шундый эт тормышында яши дип әйтергә телиме ул? Мөселманнар тормышына, мөселман хатыннарына каршы болай да һәрьяклап һөҗүмнәр оештырыла. Инде үзебез дә шушы эшкә тотындыкмыни? Ни өчен мөселман сүзен теге якка да, бу якка да төрләндереп укучыда мөселманнар тормышына дөрес булмаган караш тудырабыз? Ире мөселман булган хатын исерекләрне дә урап уза, ”иреңне барып печәм әле” дигән сүзләрне дә тыңлап тормый ул. Бәлки,мин дөрес уйламыймдыр. Ялгышсам,төзәтерсез. Безгә,газетага язучыларга, кайчагында "Сүзеңне үлчәп сөйлә” дигән бер акыллы мәкальне онытмаска кирәк, җәмәгать. Фикерләрегезне http://vafin.ucoz.ru. сайтына кереп калдыра аласыз. Авторга ихтирам белән: Фәрит Вафин.